Siddi – Siddi Wine Festival

Sustenibilidadi, chi intrat in is arrexonadas apitzu de s’ambienti e de sa produtzioni e a s’arresistèntzia de unu territòriu, bessit su fueddu crai candu chistionant de sa cultura de su binu puru. Aparicendi sa segundu editzioni de “Siddi Wine Festival”, sàbudu e domìnigu in sa biddixedda de sa Marmidda, custu est su cumbincimentu comunu de Roberto Petza, chef cun sa stedda de s’arresturanti s’Aposentu, de su collaboradori Domenico Sanna, unu giòvunu de su Campidanu de Mesu chi apustis de sa làurea at imbestiu cun infogu is cumpetèntzias cosas suas in sa terra sua, e de Marco Pisanu e Gianfranco Massa, chi funt presidenti e cumponenti de su diretivu de sa Fondazione Accademia Casa Puddu.

E apustis de millas de abisitas de sa primu editzioni (una dii sceti) ddu torrant a fai cun prus de centu cantinas chi faint biri is mellus binus, unus cincuxentu etichetas. De sa pratza de mesu bidda finas a s’arresturanti nci ant a essi is barracas po tastai su binu, is laboratòriu po is pipius puru, is amostas de coxina (cun Luigi Pomata, Stefano Deidda e su meri de domu) e is arrexonadas cun grandus stràngius. Po ndi nai unu, Paolo Marchi, creadori de Identità Golose chi impari a Petza incìngiat s’editzioni sàbudu a is 16. O Giuseppe Palmieri, sommelier de s’arresturanti modenesu “Osteria Francescana” (tres steddas Michelin) e Alessandro Pipero, meri de s’arresturanti cun steddas “Pipero al Rex” de Arroma, impinnaus in sa “mesa tunda” “Emergenza sala, emergenza vigna” a is 11 domìnigu. Serrant a is 22, e torrant a partiri s’incras a is 10 e acabant a is 21 sa segundu dii, cun medas professionistas acarendi-sì.

“Mi praxit sa stòria de sa genti e de su traballu chi nci est apalas”, narat Petza, narendi chi su festival no si pigat dinai pùblicu e chi su billetu costat 10 èurus po una dii e 15 èurus po duas diis. Calincunu eventu est po is chi nci traballant in custu mundu sceti. Po nai sa “mesa tunda” “L’unione fa la forza. Alto Adige, Emilia Romagna e Sardegna tra esperienze di Consorzi”, chi ddu cordinat Giuseppe Carrus e Lorenzo Ruggeri de su Gambero Rosso e sa de 15.30 de domìnigu, “La sostenibilità nelle aziende vitivinicole”. In prus totu is initziativas collateralis, cun is tour de is cantinas e de is àreas culturalis cun s’incuru de sa Coperativa VillaSilli (billetu a parti). “Su fil rouge de su chi faeus est a passai is cumpetèntzias, ponendi impari is prassis bonas cun s’arrealidadi nosta”, is fueddus de Massa. Sustenibilidadi bolit nai a sciri donai balori a sa terra nosta e a is arresursas seguras. “S’unicu bia po unu svilupu chi no spacit”, iat nau Pisanu, su sìndigu bèciu de Siddi.

Tradusidura de s’artìculu in italianu de Manuela Vacca, pigau de L’Unione Sarda de su 28 de austu de su 2013

Pauli Arbarei – Atòbius in sardu!

COMUNU DE PAULI ARBAREI

PROVÌNTZIA DE SU CAMPIDANU DE MESU

ARREXONADAS IN SARDU!

SU COMUNU DE PAULI ARBAREI, IMPARI A S’OFÌTZIU DE SA LÌNGUA SARDA, APARÌCIAT ARREXONADAS IN SARDU APITZU DE SA STÒRIA DE SARDÌNNIA.

IS ATÒBIUS ANT A ESSI 3:

SU 2, SU 9 E SU 16 DE SU MESI DE CABUDANNI, DE IS 16.00 A IS 19.00 IN IS APOSENTUS DE SA BIBLIOTECA COMUNALI.

EUS A CHISTIONAI DE SA STÒRIA PREISTÒRICA, DE SU TEMPUS ARROMANU, DE SU TEMPUS DE LIONORA DE ARBAREI DE BAS SERRA, FINSAS A LOMPI A OI.

PO NDI SCIRI DE PRUS E PO SI ASSENTAI A IS ARREXONADAS, FAIT A BENNI DÒNNIA MÈRCURIS DE IS 8.00 A IS 14.00 IN S’OFÌTZIU DE SA LÌNGUA SARDA, IN SA DOMU COMUNALI DE PAULI ARBAREI.

marmidda.bilingua.oi@live.com

Puli Arbarei – Festa de Santu Agostinu

Fidi, Connotu, Cultura. Is cosas chi faint mannu s’apuntamentu de importu mannu po totu is Paulesus. Prus chi totu po is chi, po calichisiat arrexoni, bivint atesu, in àteras biddas e fùrriant po custa festa. Una fiera finsas a unus cantu de annus a oi. Una dii de importu po totu sa Marmidda. Intra de is initziativas culturalis nci est sa presentada de su lìburu noi de Fulvio Tocco Giara, incanto e magia di un altipiano. Nci ant a essi àtera genti famada e su fotògrafu marmiddesu Emanuele Secci.